استعرض مصدر السلمية خيار أم عقيدة؟

السلمية خيار أم عقيدة؟
 ظهر المقال على موقع المندسة السورية، [http://the-syrian.com/archives/33282?fbclid=IwAR0hseYkGFi9eZ4tkvofbdNc0k_nMQKhzfOjZ7UvFzmRGYWNCFqymo4bGVE السلمية خيار أم عقيدة؟]، (مغلق) تحت اسم مستعار في 24 أغسطس، 2011
[http://www.scscme.org/scscme/blogs/atassib-ar/2019/05/17/%D8%A7%D9%84%D8%B3%D9%84%D9%85%D9%8A%D8%A9-%D8%AE%D9%8A%D8%A7%D8%B1-%D8%A3%D9%85-%D8%B9%D9%82%D9%8A%D8%AF%D8%A9%D8%9F/ رابط آخر للمقال]

أصدقائي، من الخطير جداً تحويل سلمية الثورة إلى فلسفة وأيديولوجيا وإلتزام عقائدي. لأن بعدين كل ما حدا طلعت براسه وأخد تاره لازم نعتذر عنه ونبرر تصرفاته بينما النظام مو فارق معه المجتمع الدولي ولا الناس ولا أرواحهم. إيران واعدته بمصاري وبترول، وهو قادر يعيش بعزلة متل كوريا الشمالية خاصة إنه روسيا والصين مصممين يركبوا خازوق لأمريكا والغرب وهي فرصتهم. اللي عم يحصل الآن مشابه لتاريخ سوريا في الخمسينات واللي قال عنه باتريك سيل الصراع على سوريا. أي أن سوريا كانت الدولة الوحيدة في المنطقة التي لم تعلن ولاءها لأحد المعسكرين لأنه كان فيها خلافات داخلية. وإلا كيف بتظنوا قامت كل هالإنقلابات. كل واحد كان وراه دولة عظمى وشوية زعران بالجيش وشوية سياسيين أغبياء ما بيطلع بإيدهن شي. حافظ الأسد مثلاً وقد لا تصدقون كان مدعوم من السعودية للتخلص من الجناح اليساري لحزب البعث ولذلك السنة دبحولوا خواريف لما شرف على المدن. طبعاً هذا لا يعني إنه مانو حقير وما كان عم يخطط ليمسك الحكم وما كان عنده حقد طائفي كبير.

يعني السلمية خيار إستراتيجي مرحلي وليس خيار أيديولوجي. لا تفهموني غلط أنا بحياتي الخاصة 100% سلمية وما مستعد إئذي إنسان. بس المجرم لازم التخلص منه وجماعة الأسد والمخابرات مجرمين وما رح يمشي الحال إلا بالتخلص منهم. بس الشغلة تخطيط. السلمية إلى الآن في صالحنا لأنها جلبت لنا تزايد أعداد المتظاهرين والدعم العالمي وفقدان الشرعية للأسد وإدانه مجلس حقوق الإنسان وقريباً المحكمة الدولية، يعني لما منقرر نثور عليه عسكريا ما حدا رح يقول لأ والكل رح يدعم إذا في فرصة لننتصر. أمريكا وإسرائيل اللي كانوا مقنتعين إنه الأسد بينفعهم عرفوا إنه جحش وغبي وبإيده سلاح يعني ما بينفع وناوين يتخلصوا منه بس بأقل كلفة لأنهم مفلسين ولأن القضية تعني تدخل إيران وحزب الله (هدول شغلتهم حياة أو موت). بس ما رح يتدخلوا عسكرياً إلا بطريقة مشابهة لطريقة أفغانستان أي بالدعم العسكري الخارجي. ليش؟ لأنه كلفة العمليات العسكرية تصل إلى مليارات الدولارات وأمريكا الآن مفلسة، مين رح يدفع؟ هدا غير أنه العمليات تبدأ بتدمير الغطاء الجوي (500 طيارة سورية ومطارات ورادارات راحوا) ومن ثم تدمير المدرعات والمنشآن (4000 دبابة سورية راحوا) وبعدين قتل الجنود (أغلبهم مجندين وما إلهم علاقة يعني النظام رح يحطهم بالصف الأول) يعني البلد رح تطلع من المولد بلا جيش لأن الأمريكان هيك بيلعبوها، تدمير ثم عقود بناء وما بيطلعوا إلا إذا الرئيس من جماعتهم. هدا غير الأحقاد بين الناس وتدمير حياتهم اللي الدولة مجبورة فيهم يعني الدولة المحررة رح تكون مفلسة لخمسين سنة قدام وقدامها جيش من الجياع والعراة. وهذا يعني قروض ومشروطة ولعبات دولية والذي منه. وطبعاً أمريكا وأروبة بدهم مصلحة إسرائيل وأو شي رح يطلبوه هو إتفاقية سلام تضمن إنه إسرائيل هي الأقوى والمستفيدة. هدا إلا إذا السعودية قررت تدفع. وهي فاتورة كبيرة ممكن تصل لحد العشرة مليارات دولار. طبعاً إذا دفعوا شو بدهم بالمقابل: بسيطة بدهم حكم بيشبههم ولذلك مركزين على تركيا ومؤتمرات كلها إخوان مسلمين. وبكرة بتشوف التكفيريين والعمليات الإنتحارية والذي منه. بس لا تخافوا هدول كلهم بدهم سوريا وبتهمهم يعني معنا ورقة رابحة ولازم نلعبها منيح وبدنا فريق دبلوماسي خارق للعادة.

السلمية أيضاً أبعدت أوروبة عن الأسد وهل تعرفون أن أروبا كانت حليفه الأكبر وهم اللي جابولوا شركات العلاقات العامة لتحسين صورته وطلعوا مرته بمجلة فوغ للأزياء. ببالكم بشار هو صاحب المخططات؟ هدا غبي وشغلتو يتفلسف عالفاضي. السوق الأوروبية بين فرنسا وألمانيا صرفوا ملايين لفتح سوق سوريا وجعلها مكان سياحة لمواطنيهم وإستثمارات وشركات، شغلة كبيرة. وهم المشتري الأكبر للبترول والغاز السوري. أما الآن فيعتبرون أن الأسد صافف تماماً مع إيران وما منه منفعة وعم يدوروا على شركاء جدد بين المعارضة. يعني أحبابي بتعرفوا شو سعر البطاقة من واشنطن لباريس لحضور مؤتمر يعني شي 1000 دولار وهدول جماعة المعارضة اللي رايحين جايين مؤتمرات وسفرات يعني على حسابهم؟ الشغلة بدها فت عملة كتير. المهم، الخيار المسلح الآن غير ممكن ليش لأننا من الصعب نربح. ما في سلاح بيكفي، ما في جنود مدربين، ما في عمق داخلي للمناورة، ما في غطاء جوي، مافي معسكرات. يعني مافي شي. أنا ما عم قول بلاها، بس عم قول لازم جمع مصاري وعمل تحالفات والتحضير للحظة المناسبة. أما اللي مات أبوه واللي مات جوزها يعني قلبي عندهم بس بحال الحرب الأهلية هدول ما بس رح يكونوا أيتام وأرامل لكن كمان رح يكونوا لاجئين بالأردن ولبنان وتركيا عم يشحدوا أو يبيعوا أجسادهم. يعني خلوهم ببيوتهم ونحنا منجمع مصاري ومنحاول نرعاهم. والتاجر الكلب اللي عم يدفع أتاوة للشبيحة بدو يصير غصب عن راسه يدفع للمحتاجين هي إسمها جمع ضرائب. 3000 شهيد بخمسة أشهر مو كتير بالمقارنة مع الحرب الأهلية. دم كل واحد غالي ورح نحاكم القتلة بس بالحرب الأهلية بيموت مئات آلاف الناس وما بينعرف مين قتلهم. شوفوا حرب الجزائر بالتسعينات. راح 200 ألف شخص وكل جهة بتتهم التانية وأغلبهم ماتوا دبح بالليل. يعني ببساطة إذا بدك تعمل رامبوا جرب لي حالك احمل 20 كيلو واركض وشوف قديش بتضاين، عشر دقايق على الأكتر. غير الخراب والأطفال الليل بيصير معهم قصور عقلي من صوت القنابل. عدا أنه المتظاهرين بيصيروا لاجئين ولا بتعرف صديقك من عدوك، يعني بدك تقتل على الهوية أو عشوائياً.

شو الحل؟ ومتى تنتهي السلمية؟ الشغلة بدها وقت وصبر وطولة بال وتخطيط وقيادة حازمة. يعني 1. التنسيقيات لازم تكون موجودة بكل حي وبكل مدينة وقرية وقيادات محلية وقيادات على مستوى البلد، مشان الإنضباط والحماية والتظاهر واستبدال الشرطة وتأمين الإعانة واحتلال الأبنية ومنع التخريب والفوضى والصراعات الطائفية وأهم شي إنتخاب الممثلين، ثم قد يتحول بعضهم إلى جنود أو إلى بيروقراطيين أو سياسيين. 2. تغطية البلد كاملة بتليفونات ثريا مشان التنسيق وتمرير الأوامر. 3. جمع أموال بشكل مركزي متل وزارة المالية والكل لازم يدفع وتقديم ميزانية للإعانة وشراء الأجهزة ويمكن شراء السلاح الفردي. 4. إصدار قانون جمعيات وأحزاب خاص بالثورة وهيئة لتسجيل الأحزاب الجديدة حتى نتمكن من تشكيل مجلس وطني منتخب. 5. ولازم نعمل فريق إستشاري من كل الإختصاصات من السوريين المتعلمين على مستوى عالي. ولازم نعمل فريق دبلوماسي للتفاوض مع الشركاء. وكذلك عمل دستور للثورة يتضمن القاسم المشترك لجميع الأطراف يعني ديمقراطية تعددية حريات قانون 6. وضع أهداف مرحلية للثورة ومراقبة تنفيذها حتى ننتقل من مرحلة إلى أخرى 7. جذب أكبر عدد من المشجعين وتحجيم المنحبكجية 8. تشكيل فريق عمليات لضرب مراكز حساسة للنظام مثل مراكز المخابرات والسجون دون تعمد القتل. يعني الجيش بدبباته مش العدو الحقيقي، العدو الحقيقي هو المخابرات. الجيش فاشل وفاسد نعم بس المخابرات هم اللي حاكمين البلد. 9. تشكيل هيئة لإستخبارات الثورة والشغلة بسيطة أجهزة تنصت، أجهزة تشويش، تعيين أماكن سكن قيادات المخابرات تحديد مواقع السجون وأماكن نوم المخابرات ومخازن أسلحتهم وكراجات سياراتهم ومراكز الوقود وأماكن راداراتهم. 10. الإتصال بالمنشقين وحمايتهم والتأكد أنهم يتبعون أوامر قيادات الثورة لأنه ما بدنا نخلص من حكم عسكر ونقع بحكم عسكر تانين جيبهم فاضي. 11. تشكيل فرقة للثورة بكتائب موزعة على المحافظات وتخزين الاسلحة في أماكن آمنة إلى أن تحين اللحظة الحاسمة. الإعتداء على مراكز الجيش والشرطة وأخذ أسلحتهم وتخبئتها  والأسلحة اللي بيتركها النظام هربوها حتى ولو كانت كمين 12. التواصل مع القيادات الدينية والعشائرية للعلويين وجذب أكبر عدد منهم بتطمينات وضمانات حقيقية وتمثيلهم في الجالس الثورية. 13. إنتاج خرائط لتوزع الجيش والمخبرين والمتاريس والأسلحة في كل بلدة أو مدينة أو قرية حتى نعرف مخططاتهم والطرق التي يسلكونها ومواعيد تبديل العناصر والذي منه. يعني لما بدنا نسيطر عليهم منكون منعرف وينهم وإيمتا بتجيهم مساعدات ومن وين. 14. تدريب شباب على أساليب عرقلة وصول الإمدادات ووصول الشبيحة حتى ولو استخدموا السلاح لضرب العجلات وشباب آخرين على صنع المتاريس وسد الحواير بأماكن حساسة متفق عليها  وسد الأوتوسترادات ومداخل المدن 15. وضع مخططات لحماية كل مدينة وحي من هجوم غير متوقع ومن القصف لأن العسكر بيتبعوا مخططات معروفة مثلاً حمص الهجوم دائماً من الغرب لأن الجهة الغربية مفتوحة وكلها بساتين والكلية الحربية بالغرب. والدبابات اللي قادرة على القصف البعيد المدى بتنعرف من طول السبطانة وهذه أحيانا يجب تدميرها 16واللي بيفوتوا على المدن وبيضربوا هدول كلهم مدرعات برشاشات من عيار خفيف ولهم عجلات أو سلاسل خفيفة. وإلا ما تخلص طلقاتهم يعني ممكن الواحد يلحقهم ليخلص الرصاص أو الوقود ويضربهم إذا لزم الأمر. منع المجندين من الإلتحاق بالخدمة العسكرية وتأمين هرب أكبر عدد منهم. 17. معرفة أماكن المطارات العسكرية وخزانات الوقود 18. التركيز على المناطق الحدودية من أجل التحرير وتكوين عمق. أصدقائي حلب والشام خلوهم للنظام لأن كل أسلحته هنيك. اللي بدنا ياه شوية عمق، طرقات حدودية للتواصل، ولذلك ضرب الأسد كل القرى الحدودية. يعني ما خيفان على الشام. شوفوا بليبيا طرابلس كانت الأخيرة. الشام إلها مشكلة كبيرة وهي أنها محاطة بتلال عالية ووعرة وكل الحرس والقوات الخاصة متمركزة على هذه التلال. يعني مستحيل أخذ دمشق دون ضربة جوية. لاحظوا إنو النظام نشر كل جنوده، والمدينة اللي بيدخلها ما بيطلع منها لأنها رح تثور وتنشق. يعني النظام أضعف نفسه بنفسه لأنه غير متوقع ضربة عسكرية. مما يجعل الجنود والأسلحة مشتتة على مسافات شاسعة وغير متحركة. يعني المدينة اللي بنحررها ما رح يحسن يستعيدها.

المختصر المفيد، السلمية الآن مفيدة جداً ورح تضل مفيدة لحتى نستعد ونتنظم ونضمن تحالفات دولية ومساعدات مالية وقيادة موحدة وتنسيقيات بكل مكان ومجلس وطني ومجلس إستشاري وهيئة دبلوماسية، وننهك النظام ونخلي أعوانه يتركوه (بغبائه وحده رح يخوفهم) ونمنع الحرب الأهلية ونعمل تحالفات داخلية ونعطي تطمينات عملية ملموسة. بعدين مندمر مراكز المخابرات وبعدين منركز على الشام. على فكرة ما مشكلة الآن إذا قنصنا القناصة بس، لازم نحمي القيادات ونقلل عدد الشهداء. أي أفكار أخرى؟

لازم نعمل صفحة مخصصة لمراكمة هذه الأفكار. المقالات والتعليقات فيها أفكار كثيرة وصدقوني الشباب أذكياء وهل الحكي يمكن نفرضه على أية قيادة مع الوقت.

تعليقات على المندسة السورية

تعليق شاعر فستوك: اخي بلبل .. مقالك اكيد مهم من ناحية تصعيد الثورة .. وفي نقط كتيرة بتتاخد منه للدراسة من قبل التنسيقيات والقيادات ..
بس موضوع السلاح .. هالموضوع اله شرط اهم من كل الشروط اللي ذكرتها .. اذا انت شلته .. بتضمن غيرك ما يشيلو ؟ يعني بكل بلد ..في ناس مع النظام بس بتقعد ببيوتها وما بتشيل سلاح .. هدول ما رح احسبهون .. بس طيب اللي مع النظام وعندن رغبة يشيلو السلاح هدول شو حلون ؟
اخي بلبل الثورة ما بتتسلح الا اذا كل كل كل الشعب انضم الها .. برأيك شقد فرصة هالشي عنا ؟ غير هيك .. معناها انت رح تشيل وغيرك من المؤيدين رح يشيل .. حرب اهلية ..
ما تبقى .. كلامك مهم .. وبيندرس مع شوية تحفظات هون وهونيك ..

تعليق المعري: لقد ورط القذافي الليبيين بالحرب حيث فتح لهم مخازن الأسلحة
يجب ألا نتورط بذلك رغم كل محاولات النظام
بعد نقاشات ومداولات كثيرة وجدنا الأفضل التمسك بثوابت الثورة: السلمية، اللاطائفية، رفض التدخل العسكري
ذلك لأن السلمية أرخص الحلول من الناحية الوطنية وعدد الشهداء
وهي تنزع من النظام مؤيديه.
وهو كان يدس بعض الشببيحة بين المتظاهرين ليطلقوا النار على الجيش مما يستدعي الرد من الجيش
الرجاء الرجاء السلمية. غاندي قاوم بريطانيا بالسلمية

تعليق سمير عبد الله: . تشكيل فريق عمليات لضرب مراكز حساسة للنظام مثل مراكز المخابرات والسجون دون تعمد القتل. يعني الجيش بدبباته مش العدو الحقيقي، العدو الحقيقي هو المخابرات. الجيش فاشل وفاسد نعم بس المخابرات هم اللي حاكمين البلد!!
الله يسامحك دوختني..كان ممكن تختصر الحالة السورية برقم 8 وهو الأهم..طبق كل ما قلته على رقه 8!؟أو أن تعيد صياغة المقالة طبقا للرقم 8..لقد دخل ألأمن السوري ومخابراته وأذرعهم إلى كل بيت سوري؟
مع أن غاندي سورية قد حفر للآن 3/4 قبر النظام السوري إلا ان خيار المجابهة العسكرية غير مستبعد رغم كلفته الباهظة جدا خاصة أن النظام السوري لا دين له ومستعد للقتل إلى ابعد ما نتوقعه!!
إذن تدمير البنية التحتية للأمن السوري ومخابراته هو حجر الأساس لتقويض النظام…شدوا الهمة!؟
رقم 8 سيء في ذاكرة السوريين ويرتبط بالمادة 8 من الدستور وهي قيادة حزب البعث للدولة وبالتالي إن إسقاط هذا الحزب أمر أساسي لأنه هو من سمح للعسكر بركوب ظهر الشعب السوري طيلة كل تلك الفترة,وحول البعثيين إلى مجرد مخبرين!؟
لغتكم العربية جميلة حيوية ,رجاء حافظوا على الفصحى منها!!!!!!!!!!!!!!!

تعليق بلبل الحرية (إسمي المستعار): نعم أصدقائي، أنا معكم إنه السلمية حققت إنتصارات. لكن اللي جاب مثال غاندي نسي إنه غاندي نجح لأنه بريطانيا كانت ضعيفة جداً بعد الحرب العالمية والهند حققت إستقلالها عام 1947. ومع ذلك غاندي ما حسن يمنع إنقسام البلد والإقتتال الديني. نعم السلمية ضرورية الآن وبعد شهر و شهرين لكن تخيل أن الأسد قرر الرحيل، هل تعتقد أن المخابرات معهم مصاري ليرحلوا؟ أو أنهم رح يسلموا سلاحهم. هل تعتقد أن الجيش رح يكون معنا أو رح يقدر يحمينا من فرق الموت. الجيش لن ينشق دون تأمين غطاء جوي. وحتى لو انشق فسيستلم الجنرالات القضية ويعملوها حرب مشان يوصلوا للسلطة. لا تنسى أنه جيشنا متعود على طرق معينة وأنه في الحقيقة جيش غير وطني وغير منتظم وفاسد. يعني لا تعلق عليه آمال كبيرة. أنا قلت جمعوا سلاح لأنه رح تكون لحظة نحتاجه وإنشا الله لن نحتاجه. لكن التحضير ضروري وإلا كيف رح تحمي الأحياء والقرى وتمنع الإقتتال الطائفي. وشوف بكر سوريا ما رح تتحرر غير قرية قرية ومدينة مدينة وزنقة زنقة. لأنا لا أفرض وجهة نظري، لكن أقول تجهزوا لأسوأ الإحتمالات. أما الآن بالتركيز على التنظيم واتساعه والتمثيل الحقيقي وبناء تحالفات قبل ما تاكلنا تركيا ويجوا السعوديين الإنتحاريين. أما تحويل السلمية إلى عقيدة فنظر إلى أية أيديولوجيا وسترى بأن نقطة قوتها هي نقطة ضعفها أي أنها ثابتة لا تتغير ولا تتأقلم تجذب الناس في البداية وتضعهم في مأزق في النهاية. ومن السهل مهاجمتها نظرياً باعتبار أي عمل مسلح من أي شخص سيكون دليلاً. خلينا مرنين دقيل الله. خلوها سلمية قد ما بدكم بس لما بيتحول النظام لوحش مسعور منكون قادرين نحافظ على أرواحنا. هي ثورة واستيلاء على السلطة مش مسابقة عض على الأصابع ومين بيصرخ أول.

تعليق أحمد كنعان: طلب التدخل الدولي بأي صورة؟!
الشيء الوحيد المطروح هو حظر جوي،ما هيك؟!
طيب الحظر الجوي لشو بينعمل؟!

“يتم فرض الحظر الجوي عندما يكون هناك قوات برية قادرة على ردع قوات الخصم، وتكون ميزته الكبرى هي الجو، فيتم تحييد الجو، وتتكفل القوات البرية بإنجاز المهمة”

تفضل قلي والحكي للجميع: عندنا قوات برية تتكفل بشي 5000 آلية على الأقل (هاد اللي منتشر مو اللي عنده)؟
نحن عبنقول: خلونا على السلمية لوقت اللي نجهز، وبعدين بنطلب حظر جوي، وبننهي القصة
أما هيك قشة لفة ما بتصير الدنيا، ولا بتنتصر الثورة

تعليق بلبل الحرية (تعليقي): يعني الأوروبيين والأمريكان عند طلبنا بنكبس زر بيعملوا حظر جوي. أصدقائي الحظر الجوي شغلة مكلفة جداً وبدها أنظمة إلكترونية مابيملكها إلا الأمريكان. الحظر الجوي يعني طيارات أواكس موصولة مع أقمار صناعية موصولة مع حاملة طيارات متوقفة قبالة السواحل السورية موصولة مع القاعدة العسكرية في تركيا. طيارة الأواكس بتتزود بنزين بالهوا. ودوريات الإف 16 بدها تكون جاهزة على مدار الساعة لإسقاط أية طائرة تخرق الحظر الجوي. هالشي إسمو منظومة دفاع جوي يعني كله موصول ببعضه وبيوجه الطيارات والصواريخ أوتوماتيك. كتبوا عن هالشي قبل ليبيا. الشغلة بتكلف مليارات الدولارات. لا تحلموا أبداً بحظر جوي وما تحلموا أبداً إنه سوريا تطلع من الأزمة ب500 طيارة و4000 دبابة متل الآن إلا بتقديم تنازلات في السياسة الخارجية. هي فرصة إسرائيل وأمريكا الذهبية وما راح يضيعوها. وإذا ما تدخلوا كسبانين لأنه الأسد حيكون ضعيف وإذا تدخلوا كسبانين لأنهم رح يحطموا الجيش. اللي قاعد عم يثور وعم يحلم لازم يعرف إنه رح يقدم تنازلات دولية عاجلاً أم آجلاً، أو يختار حلفاء ويضل معاهم وينتفع منهم، أو ياخد حقه بإيده، 3 خيارات مافي غيرهم وكل خيار إلو تمن. وبالنهاية ما رح يشتري سلاح من روسيا ورح يروح لفرنسا ويشتري منها ومنرجع منقدم نفس التنازلات. إلا إذا حابين الصين أو حابين تضلوا حلفاء روسيا. ولا مفكرين رح تضلوا تلعنوا إسرائيل وتحاربوها وترجعوا الجولان. يعني رح تبيضوا علينا متل حافظ الأسد والبعث وتعملوا جيش ممانعة ومقاومة. الحظر الجوي ودعم أوروبا بيبعد كل ما حدا حكى على أمريكا وإسرائيل والجولانز يعني ببالكم تركيا عم تدعم الإخوان المسلمين لسواد عيونهم، هدول قدموا التنازلات المعروفة وعم يرموهم علينا رمي. تركيا حليف الناتو ولا تفكروا أبداً إنهم شرقيين وبيحبونا لإننا مسلمين. تركيا بتتشاور مع أمريكا والسعودية قبل أية خطوة وما مستعدين يتنازلوا عن عضوية الناتو لو منروح كلنا معس. تركيا اليوم خلقت بعد خمسين سنة ضخ أموال من أمريكا وأوروبا. الناس عم تموت جوع، لازم نركز على مصلحة سوريا بس. أنا مع السلمية وبتمنى تنتصر الثورة وتضل سوريا قوية وعندها موقفها الخاص وما حدا يفرض عليها رأي. بس على الأقل احسبوها واعطوني جواب مقنع، عطوني شي مخطط لتفاصيل إسقاط النظام شي رؤية لسياسة سوريا الخارجية بعد النظام شي مخطط لإعادة بناء دولة ما فيها قاضي واحد مانو فاسد. شو المخطط؟ شو التحالفات؟ شو المراحل؟ شو النظام الإقتصادي المستقبلي؟ حكي التنسيقيات لسا غائم وبعضه فيه نفس يساري؟ مين هد التاجر اللي رح يساعدنا إذا رح نعملوا دولة العمال والفلاحين. مين هدا العلوي اللي رح ينشق إذا الناس بدها تحاكم كل إنسان أطلق رصاصة. في قرى بأكملها مخابرات وحرس وفرقة رابعة. هدول بدهم ضمانات. يا ترى شو مخططنا تجاههم. لحد الآن الواضح إنه بدنا نلعن أفطاص أفطاصهم بعد الثورة. شو رح تعملوا بمئات آلاف عناصر المخابرات اللي عم يقبضوا معاشات وما بيعملو شي نافع. بدكم تحطوهم بالشارع يشحدوا. شو بدكم تعملةا بالجيش اللي تعداده 400 ألف جندي وضابط وبيفرخوا ضباط متل الأرانب بعلامات حد النجاح بالبكالوريا، بدكم تطردوهم. (يتبع)

(يتبع تعليق بلبل الحرية): تكملة تعليق بلبل الحرية: شلون رح ترجعوا الجيش لقيادة مدنية وتنقصولهم الميزانية هدول متعودين عز متعودين بزخ وصرف دون حدود. رح ترجعوا تبعتوهم يتعلموا بروسيا ولا رح تبعتوهم على فرنسا. والأسلحة الكيماوية اللي نظام مخزنها ببالكم أمريكا وأوروبا نسيوها. هي فرصتهم وما رح يتركوها. دولة متل سوريا عم تنبنى من جديد بتطلع الإقتصاد الفرنسي كله من الركود. العيون علينا ومار رح يتركونا يعني الشغلة مصالح وما في يما ارحميني. بقى مشان الله لا تقللي السلمية عقيدة. السلمية خطة وكل شي بعدها خطة. فشو المرحلة التانية؟ هادا سؤالي. أنا ما عم أظلم الدنيا بوجوهكم بس حتى أكبر الأحزاب عقائدية قياداتها بتعمل تحالفات هيك هيك من ورا ضهر الأعضاء. بدها مرونة الشغلة. الحلم والإيمان والأمل بيخليك تقوم من النوم وتطلع مظاهرة بس ما بيحقق نصر ولا بيبني بلد وبالأخير بيجوا ولادين الحرام بياخدوا كل شي. اللي عم نعملوا ثورة ما إنقلاب وشوفوا تاريخ الثورات. الثورة يعني عم تطرد عالم معهم إمتيازات وتجيب عالم جدد. والحقيقة القديم اللي مالك الدولة ما بيروح إلا قتل. الثورة الفرنسية ضلوا يقتلوا ببعضهم 4 سنين وبعدين عطوها لنابليون ليحلها وعمل فيها بطل قومي وديكتاتور. الثورة اليونانية ضد العثمانيين دخلوا فيها الأوروبيين وعملولهم ملك ألماني على ما أعتقد. والثورة الروسية ركبوا البلشفيين على انتصارات المنشفيين وراحت حرب أهلية أربع سنين مات فيها ملايين غير اللي قتلهم ستالين. الثورة الإيرانية ضلوا مظاهرات سنتين وعملوا تنسيقيات متل حكايتنا والجيش صف معهم بعدين، بس ركبوهم الإسلاميين وخود على إعدامات. لك سكروا الجامعات سنتين لحد ما عملوا مناهج إسلامية جديدة. ثورات أوروبة الشرقية نجحت لأن الجيش كان روسي فلما انسحب طلعوا مظاهرات. إلا برومانيا وصار فيها حرب شوارع وبعدين استلموا الجنرالات تبعون تشاوشيسكو. الثورة الكوبية، طردوا مئات آلاف الناس وشوفوا ما أحلى عيشتهم الآن. شو في لسا ثورات. أما غاندي ما كان بيحلم يربح لو ما حصلت الحرب العالمية التانية. الثورة الجزائرية 8 سنين حرب وبعدين طردوا مليون فرنسي ويهوجي وجزائري متعاون وحطوا محلهم مجاهدين ما بيفكوا الخط. إذا فعلاً ما بدكم الناس تموت بتدخلوا بتحالفات مع الجن الأزرق وبتعملوا مصالحة وطنية وبتعطوا تطمينات وبتفرضوا نفسكم كقوة لا يستهان بها قادرة إنه تحمي نفسها دون أن تستخدموا السلاح بس لازم تثبتوا إنه فيه سلاح وما خايفين نستعملوا بس منفضل المصالحة. شوفوا جنوب إفريقيا، كانوا أفظع من حكم الأسد، لا تقللي، أفظع منه بمئات المرات وبعدين عملوا مصالحة وطنية وقانونها مترجم للعربية. بس لازم الحكم يوصل لمرحلة أتباعه يقولوا ما عاد بدنا نقاتل؟ أما مصر وتونس فهدول صارت ثورة علىالتلفزيون بس الحقيقة صار إنقلاب عسكري وشوفوهم شو لسا عم ياكلوا قتل. اليمن، حبيبي اليمن الولد بتجي هدية على عيد ميلادو بارودة روسية والقبائل عندها مدافع بس ما استخدموها. بس هددوا باستخدامها كقوة ردع. ما تخلوا الأسد سيتوطي حيطنا. لا نحنا ولا العلويين بدنا حرب أهلية بس لازم نعطي ضمانات ونعمل تحالفات إذا بدنا نحافظ على البلد وأسلحة الجيش واقتصاد البلد وناس البلد.

تعليق بلبل الحرية: نعم أصدقائي، أنا معكم إنه السلمية حققت إنتصارات. لكن اللي جاب مثال غاندي نسي إنه غاندي نجح لأنه بريطانيا كانت ضعيفة جداً بعد الحرب العالمية والهند حققت إستقلالها عام 1947. ومع ذلك غاندي ما حسن يمنع إنقسام البلد والإقتتال الديني. نعم السلمية ضرورية الآن وبعد شهر و شهرين لكن تخيل أن الأسد قرر الرحيل، هل تعتقد أن المخابرات معهم مصاري ليرحلوا؟ أو أنهم رح يسلموا سلاحهم. هل تعتقد أن الجيش رح يكون معنا أو رح يقدر يحمينا من فرق الموت. الجيش لن ينشق دون تأمين غطاء جوي. وحتى لو انشق فسيستلم الجنرالات القضية ويعملوها حرب مشان يوصلوا للسلطة. لا تنسى أنه جيشنا متعود على طرق معينة وأنه في الحقيقة جيش غير وطني وغير منتظم وفاسد. يعني لا تعلق عليه آمال كبيرة. أنا قلت جمعوا سلاح لأنه رح تكون لحظة نحتاجه وإنشا الله لن نحتاجه. لكن التحضير ضروري وإلا كيف رح تحمي الأحياء والقرى وتمنع الإقتتال الطائفي. وشوف بكر سوريا ما رح تتحرر غير قرية قرية ومدينة مدينة وزنقة زنقة. لأنا لا أفرض وجهة نظري، لكن أقول تجهزوا لأسوأ الإحتمالات. أما الآن بالتركيز على التنظيم واتساعه والتمثيل الحقيقي وبناء تحالفات قبل ما تاكلنا تركيا ويجوا السعوديين الإنتحاريين. أما تحويل السلمية إلى عقيدة فنظر إلى أية أيديولوجيا وسترى بأن نقطة قوتها هي نقطة ضعفها أي أنها ثابتة لا تتغير ولا تتأقلم تجذب الناس في البداية وتضعهم في مأزق في النهاية. ومن السهل مهاجمتها نظرياً باعتبار أي عمل مسلح من أي شخص سيكون دليلاً. خلينا مرنين دقيل الله. خلوها سلمية قد ما بدكم بس لما بيتحول النظام لوحش مسعور منكون قادرين نحافظ على أرواحنا. هي ثورة واستيلاء على السلطة مش مسابقة عض على الأصابع ومين بيصرخ أول.